Was seisch?

Musig: PL / Reduziert: Kay Zee / Lyrics: Baumee

Ufgschreckt dur di luut Sirene simmer devogwetzt

Zum Feischter usegumpt und d‘ Tür vom Turbohoover zuegschletzt

Vollgas geh und über d‘ Husdächer abgaue

Mir händ grad wele dä <beep> ihri Mikrophon chlaue

Lärm über dä Stadt wo jedes Wort sich drin verlürt

Es Donnere und Pfiffe wo jedä im Mage gschpürt

Alles vermischt sich zu eim Grolle überall en riise Krach

Aber mir händ eus scho dra gwönt s‘ ischs Jahr 2008

Uf dä Strass händ all Lüüt en Ohreschutz agleit

Will sonen rise Lärm kein Mänsch me vertreit

Es Mikrophon am Mul mit eme Verschtärcher dra

Und so schreit mittlerwile jede dä ander aa

Ohni Mikro häsch nüt z‘ säge will dich eso niemer ghört

All Forme vo normaler Kommunikation sind zerstört

I alle Hüüser i alle Trams hät’s Mikros wils da so dröhnt

Ohni bisch kein Mänsch me wirsch vergässe und übertönt

Züri seit uuh Züri sei ooh

Wänn ich nüt me säge händs mer s‘ Mikrophon weggno

Zmitzt drin sind mir die gsuechte Räuber und Verbrächer

Flüged über d‘ Stadt und landed uf dä Husdächer

Stiged i jede Chäller und uf jede Balkon

Knacked jede Safe und chlaued jedes Mikrophon

Usgraubt wird jede wo uf dä Strass spaziert

Gäld wämmer ekei mir sind a Mikros interessiert

Chunt ois en Bull id Queri häd er dä Zitpunkt sehr schlächt gwählt

Chan er doch sowieso nüüt me säge will scho sis Mikrophon fehlt

Nüt me chan oi hebe mir wiched nöd ab vo usem Plan

Total usser Rand und Band ziehnd mir über d‘ Stadt wienen Orkan

Klari Zeiche Züri isch em Undergang gweiht

Und wehrt sich öpper wird er agschreit bis er umgheit

Jedes Mittel isch ois rächt mir verwänded jede Trick

Ums oise Plan durezzieh spränged mer ä d‘ Mikrophonfabrik

Alles zittered vorAngscht vor eusem nächschte Überall

Nüt me isch vor eus sicher Angscht und Schrecke überall

Züri seit uuh Züri sei ooh

Wänn ich nüt me säge händs mer s‘ Mikrophon weggno

Und so ischs cho so händ mir d‘ Macht überno

Sind is Stadthus igschtige und händ au det d‘ Mikros weggno

Es paar Lüt sind froh die meischte nöd eso

Es chan niemer reklamiere s‘ git kei Revolution

Wer chan scho revolutioniere ohni Mikrophon

Und so chönd mir unumschränkt regiere

Bruched nöd mal s‘ Militär

So lönd sich all vo eus füere

Wie wänn’s scho immer so gsi wär

Und so wird sich nüt me ändere s‘ händ sich all scho dra gwöhnt

S‘ isch niemer uf d‘ Idee cho dass mer dä Lärm abstele chönnt